Винисиус болашағына қатысты шешім қабылдады

Футболшы мансабын Мадридтің «Реал» клубында жалғастыруды көздеп отыр және басқа командаға ауысу нұсқасын қарастырмайды.

COPE мәліметінше, Винисиус өз агенттеріне ұстанымын жеткізіп, «Реал» басшылығымен жаңа келісімшарт бойынша келіссөздерді мүмкіндігінше тезірек аяқтауды сұраған.

«Барлығын мүмкіндігінше тезірек реттеңіздер. Мен осында қалғым келеді», – деген бразилиялық шабуылшы.

Осылайша, Винисиус Мадрид клубынан кетуі мүмкін деген қауесеттерге нүкте қойғандай болды. Бұған дейін БАҚ-та футболшыға басты үміткер ретінде Лондонның «Арсеналы» аталған еді. Дереккөздердің хабарлауынша, ағылшын клубы шабуылшы үшін шамамен 150 миллион еуро төлеуге дайын болған, ал бас бапкер Микель Артета ойыншыны АПЛ-ға ауысуға жеке өзі көндіруге тырысқан.

Винисиустың «Реалмен» қазіргі келісімшарты 2027 жылдың жазына дейін жарамды. Алдағы күндері тараптар жаңа келісім бойынша кезекті кездесу өткізуді жоспарлап отыр. Футболшының өзі Мадридте қалуға ниетті болғандықтан, жаңа келісімшартқа қол қою ықтималдығы жоғары бағалануда.