Бибисара Асаубаеваға II дәрежелі «Барыс» ордені табысталды
Фото: Norway Chess 2026
Қазақстандық шахматшы Бибисара Асаубаева блиц бойынша әлем чемпионатындағы жеңісі үшін II дәрежелі «Барыс» орденімен марапатталды.
Асаубаева бұл марапатты алғанын хабарлап, орденнің бұған дейін Қасым-Жомарт Тоқаев жарлығымен берілгенін айтты. Спортшы өз Telegram-арнасында видео жариялады.
«Мен көптен күткен II дәрежелі “Барыс” орденін алдым. Менде III дәрежесі бар, енді I дәрежесі қалды. Сонда толық кавалер боламын. Қараңыздаршы, қандай әдемі. “Барыс” ерекше түсті екен», – деді Асаубаева.
Еске сала кетейік, 2026 жылдың маусым айында Асаубаева президентке ашық видеоүндеу жасап, қаржыландыру мәселелері, қолдаудың жоқтығы және жалақының қысқаруы туралы айтқан болатын. Кейін ҚР Туризм және спорт министрлігі төлемдердің қайта қаралуын басым спорт түрлері туралы заңның күшіне енуімен түсіндірді, өйткені шахмат Олимпиада ойындарының бағдарламасына кірмейді.
