Давид Дегтяревтің Азия Пара ойындарындағы күмісі және Майкл Биспингтің жарқын жекпе-жегі: 8 қазан тарихта

Қазақстан

Давид Дегтяревтің тарихи медалі

2018 жыл — осы күні қазақстандық пауэрлифтер Давид Дегтярев (54 келі) Джакартада (Индонезия) өткен Азия Пара ойындарында күміс медаль жеңіп алды. Ол 157 келі зілтемір көтеріп, 178 келі нәтижемен жеңіске жеткен вьетнамдық Бин Ан Нгуеннен кейін екінші орын алды. Үшінші орын ирактық Аль-Али Дарраджиге (143 келі) бұйырды.

Давид Дегтярев — жазғы Паралимпиада ойындарында пауэрлифтингтен екі рет чемпион атанған Қазақстан тарихындағы алғашқы спортшы (Токио-2020, Париж-2024).

Қазақстандықтар Ханчжоудағы Азия ойындарындағы өнерін аяқтады

2023 жыл — осы күні Қытайдың Ханчжоу қаласында Азия ойындарының соңғы жарыс күні өтті.

Каратэші Мөлдір Жаңбырбай (50 келі) күміс медаль жеңіп алды. Финалда қазақстандық спортшы Қытайлық Тайбэй өкілі Гу Шяу-Шуаннан жеңілді.

Қазақстанның көркем жүзуден құрамасы (Жаклин Якимова, Этери Какутия, Арина Пушкина, Анна Павлецова, Ясмин Туякова, Айгерім Құрманғалиева, Наргиза Болатова, Жания Жиенғазы, Арина Мясникова, Ксения Макарова) командалық жарыста қола жүлдеге ие болды.

Ханчжоудағы Азия ойындарында Қазақстан спортшылары жалпы есепте 10 алтын, 22 күміс және 48 қола медаль жеңіп алды. Бұл нәтиже Қазақстан құрамасына жалпыкомандалық есепте 11-орын алуға мүмкіндік берді.

Әлем

Автоспорттағы айтулы күн

1961 жыл — британдық Иннес Айрленд (Lotus-Climax) «Уоткинс-Глен» трассасында өткен АҚШ Гран-приінде жеңіске жетті. Екінші орын америкалық Дэн Герниге (Porsche), үшінші орын британдық Тони Брукске (BRM-Climax) бұйырды.

1972 жыл — АҚШ Гран-приінде британдық Джеки Стюарт (Tyrrell-Ford) жеңіске жетті. Екінші орынды француз Франсуа Север (Tyrrell-Ford), үшінші орынды жаңа зеландиялық Денни Халм (McLaren-Ford) иеленді. Жарыс «Уоткинс-Глен» трассасында салқын, бірақ жаңбырсыз ауа райында өтті.

1978 жыл — канадалық автошабандоз Жиль Вильнёв (Ferrari) Формула-1-дегі алғашқы ірі жеңісіне жетіп, Канада Гран-приін ұтты. Екінші орын оңтүстікафрикалық Джоди Шектерге (Wolf-Ford), үшінші орын аргентиналық Карлос Ройтеманға (Ferrari) бұйырды.

Бокс тарихынан

1974 жыл — америкалық боксшы Оскар Альбарадо Токиода өткен турнирде жапониялық Рю Сориматиді жетінші раундта нокаутқа түсіріп, бірінші орта салмақтағы абсолютті әлем чемпионы атағын қорғады.

Майкл Биспингтің жеңісі

2016 жыл — UFC-дің орта салмақтағы қазіргі чемпионы, ағылшын Майкл Биспинг пен америкалық Дэн Хендерсон арасында реванш өтті. Биспинг қарсыласын төрешілердің бірауызды шешімімен (48:47, 48:47, 49:46) жеңіп, чемпиондық белбеуін қорғады. Бұл жекпе-жек Манчестерде өткен UFC 204 турнирінің басты кездесуі болды.

Ига Свёнтектің жарқын жеңісі

2023 жыл — поляк теннисшісі Ига Свёнтек Бейжіңдегі WTA 1000 турнирінің финалында ресейлік Людмила Самсонованы 6:2, 6:2 есебімен жеңді. Ол кезде әлемнің екінші ракеткасы болған Свёнтек жекелей сында WTA турындағы 16-шы титулын иеленді.

8 қазанда әлем тарихында болған оқиғалар

1908 жыл — неміс шаштаразы әрі кәсіпкер Карл Людвиг Несслер Лондонда химиялық шаш бұйралауды алғаш рет көпшілікке таныстырды.

1980 жыл — ямайкалық композитор Боб Марли соңғы концертін өткізді. Концерт кезінде ол есінен танып қалды. Арада жеті ай өткен соң өнерпаз қатерлі ісіктен қайтыс болды.

2022 жыл — италиялық велошабандоз Филиппо Ганна бір сағаттық веложарыста жаңа әлемдік рекорд орнатты. Ол 60 минутта 56,792 шақырым қашықтықты жүріп өтті.

Бұл күні дүниеге келгендер

1928 жыл — Диди (Валдир Перейра), әйгілі бразилиялық футболшы, әлемнің екі дүркін чемпионы, FIFA Даңқ залының мүшесі. Ол 1950 жылғы 15 маусымда Рио-де-Жанейро штаты мен Сан-Паулу штаты құрамалары арасындағы матчта (3:1) «Маракана» стадионының тарихындағы алғашқы голды соққан.

1946 жыл — Валерий Резанцев, кеңестік грек-рим күресінің шебері, Олимпиада ойындарының екі дүркін чемпионы (Мюнхен-1972, Монреаль-1976).

2005 жыл — Алина Ажғалиева, қазақстандық шорт-трекші, төрт құрлық чемпионатының қола жүлдегері.