Демеу Жадраевтың тарихи Олимпиада жүлдесі және Рой Джонстың реванштағы жеңісі: спорт тарихындағы бұл күн

Қазақстан

2024 жыл – бұл күні Қазақстан құрамасы Париж Олимпиадасындағы медаль қоржынына бірден екі күміс жүлде қосты.

Грек-рим күресінен Демеу Жадраев (77 кг) финалда жапониялық Нао Кусакеден 5:2 есебімен жеңілді. Олимпиадада күміс медаль иеленген бұған дейінгі қазақстандық «классик» – Георгий Цурцумия (Афины-2004) болатын.

Боксшы Нұрбек Оралбай (80 кг) финалда төрешілердің бөлінген шешімі бойынша украиналық Александр Хижняктан жеңіліп қалды.

Әлем

АҚШ аумағын көлікпен кесіп өткен алғашқы әйел

1909 жыл – осы күні америкалық Элис Рэмси тарихтағы АҚШ аумағын көлікпен толық аралап өткен алғашқы әйел атанды. Ол сапарды «Максвелл» маркалы автокөлікпен жасады.

Рэмси бұл саяхатқа екі абысыны Нетти Пауэлл мен Маргарет Этвуд және 16 жастағы құрбысы Гермин Джэнспен бірге шықты. Жалпы сапар барысында олар шамамен 6115 шақырым жол жүрді.

Жол бойында әйелдер көптеген қиындықтарға тап болды: дөңгелектерін өздері ауыстырды, көлікті балшықтан шығарды және түрлі ақауларды жөндеді. Бұл сапар әйелдердің көлік жүргізуіне қатысты қалыптасқан стереотиптерді бұзуға бағытталған «Maxwell Automobile» компаниясының бастамасы болды.

Айта кетейік, 1909 жылдан кейін Рэмси АҚШ аумағын тағы 30-дан астам рет кесіп өтті. Соңғы сапарын ол 88 жасында жасады. Элис Рэмси 1983 жылдың қыркүйегінде 96 жасында дүниеден өтті.

Грета Вайтцтің бірегей жетістігі

1983 жыл – осы күні норвегиялық жеңіл атлет Грета Вайтц Хельсинкиде өткен 1983 жылғы әлем чемпионатында әйелдер арасындағы алғашқы марафон жарысының (42 км 195 м) жеңімпазы атанды.

Оның нәтижесі – 2 сағат 28 минут 09 секунд. Екінші орынды америкалық Марианна Дикерсон (2:31:09), ал үшінші орынды кеңестік спортшы Раиса Смехнова (2:31:13) иеленді.

Спорт тарихындағы бұл күн: Жапонияның бейсболдағы алтыны, Рой Джонс кішідің реваншы және Андерсон Силваның керемет камбэгі

Бейсбол тарихынан

2021 жыл – осы күні Жапония ерлер бейсбол құрамасы Токио Олимпиадасында алтын медаль жеңіп алып, тарихта алғаш рет Олимпиада чемпионы атанды.

Финалда жапониялықтар АҚШ құрамасын 2:0 есебімен жеңді. Бұған дейін Жапония бейсболшылары Олимпиада ойындарында Атлантадағы жарыста күміс, сондай-ақ Сеул-1988 және Афины-2004 ойындарында екі қола жүлде иеленген болатын.

Жартылай ауыр салмақтағы әйгілі реванш

1997 жыл – осы күні америкалық боксшы Рой Джонс кіші британдық Монтелл Гриффинмен реванш өткізіп, қарсыласын бірінші раундта нокаутпен жеңді. Осы жеңістен кейін ол WBC нұсқасы бойынша чемпиондық белбеуін қайтарып алды.

Джонс кіші мен Гриффин арасындағы алғашқы жекпе-жек наурыз айында өткен еді. Сол кездесуде «Капитан Хук» деген лақап атқа ие боксшы чемпиондық белбеуінен айырылып қана қоймай, кәсіпқой мансабындағы алғашқы жеңілісін тіркеді.

Жекпе-жектің тоғызыншы раундында Джонстың кезекті шабуылынан кейін Гриффин тізерлеп құлаған. Сол сәтте Джонс кіші қарсыласына тағы бірнеше соққы жасап қойды. Ереже бойынша құлаған боксшыны ұруға болмайтындықтан, Рой Джонс кіші дисквалификацияланды.

Чейл Соннен UFC аңызын жеңуге шақ қалған сәт

2010 жыл – осы күні UFC орта салмақтағы чемпионы болған бразилиялық ММА шебері Андерсон Силва UFC 117 турнирінде америкалық Чейл Сонненді бесінші раундта ауырту әдісімен жеңіп, чемпиондық белбеуін қорғады.

Кездесудің алғашқы төрт раундында басымдық толығымен Соннен жағында болды. Алайда соңғы сәтте Силва жеңісті жұлып алып, промоушен тарихындағы ең керемет камбэктердің бірін жасады. 2024 жылы бұл жекпе-жек UFC Даңқ залына енгізілді.

Бұл күні дүниеге келгендер:

1982 жыл – Яна Клочкова, украиналық жүзгіш, төрт дүркін Олимпиада чемпионы, сондай-ақ 2000 жылғы Сидней Олимпиадасының күміс жүлдегері.

1987 жыл –  Сидни Кросби, канадалық хоккейші, екі дүркін Олимпиада чемпионы (Ванкувер-2010, Сочи-2014), Олимпиаданың күміс жүлдегері (Милан–Кортина-2026), үш дүркін Стэнли кубогының иегері.

1995 жыл – Абат Аймбетов, қазақстандық футболшы, ел тарихындағы үздік сұрмергендердің қатарына кіретін шабуылшы.