F-тобы: Нидерланд, Жапония, Тунис, Швеция

Нидерланд құрамасы

ФИФА рейтингіндегі орны: 7

Әлем чемпионаттарындағы үздік нәтижесі: финалист (1974, 1978, 2010)

Бас бапкері: Рональд Куман

«Ұшқыр голландтар» 2026 жылғы әлем чемпионатына бұрын үш рет бағындыруға жақын болған, бірақ әр жолы финалда тоқтаған биіктікті еңсеру үмітімен келеді. 1974 жылы олар Германияға, келесі мундиальда Аргентинаға, ал 2010 жылғы әлем біріншілігінде Испанияға есе жіберді.

Осы үш мүмкіндіктің бәрінде де нидерландтықтар чемпиондыққа өте жақын болды. Германияға қарсы финалда «қызғылт сары» команда есепте алда тұрғанымен, жеңісті ұстап қала алмады. Ал Аргентина мен Испанияға тек қосымша уақытта жол берді.

Нидерланд құрамасы соңғы рет 2014 жылы Бразилияда өткен әлем чемпионатында жүлдеге ілікті. Сол турнирде олар қола медаль жеңіп алды. Алайда келесі мундиальды мүлде өткізіп алды, ал Катарда ширек финалмен шектелді. Ол жерде болашақ чемпион Аргентинаға пенальти сериясында жол берді.

Қазір Рональд Куман баптайтын команда турнирдің басты фавориттері қатарына кірмейді. Бәлкім, бұл олардың өзіне тиімді шығар. Егер Жапонияны F тобының «қараңғы аты» деуге болса, Нидерландты бүкіл турнир аясындағы жасырын фавориттердің бірі деуге болады.

Оларды негізгі үміткер санамайды, бірақ голландтардың өзі ешкімнен қорықпайтыны анық. Қазіргі құрамда Еуропаның үздік клубтарында ойнайтын өте тәжірибелі футболшылар бар. Олардың басым бөлігі Англия премьер-лигасында өнер көрсетеді. Қаласаңыз, Нидерландтың негізгі құрамын толықтай АПЛ ойыншыларынан құрауға болады.

Олардың қатарында Юрриен Тимбер, Натан Аке, Тиджани Рейндерс, Вирджил ван Дейк, Райан Гравенберх және Коди Гакпо секілді нағыз жұлдыздар бар. Бұған қоса, «Интердің» тынымсыз ойыншысы Дензел Дюмфрис, «Романың» шабуылшысы Дониелл Мален және «Барселона» капитаны Френки де Йонг та ұлттық құраманың маңызды тұлғалары саналады.

«Ұшқыр голландтардың» бапкері де титулдың не екенін жақсы біледі. Рональд Куман футболшы ретінде көптеген трофей жеңіп алды, соның ішінде 1988 жылы Еуропа чемпионы атанды. Кейін бапкер ретінде де клубтық деңгейде ірі жетістіктерге жетті. Бірақ Нидерланд құрамасымен әзірге үлкен табысқа қол жеткізе алған жоқ. Айта кетейік, бұл – оның ұлттық құрамадағы екінші кезеңі.

2026 жылғы әлем чемпионатында «қызғылт сарылардың» топтан шығуына қатысты қиындық туындамауы тиіс. Алайда плей-оффтың алғашқы кезеңінде олар өте күрделі қарсыласқа тап болуы мүмкін. Себебі F және C топтарының құрамалары өзара жолығады, ал C тобында Бразилия мен Марокко бар.

Егер голландтар 1/16 финалдағы кедергіден сүрінбей өтсе, олардан кез келген нәтижені күтуге болады. Тіпті чемпиондыққа дейін. Бірақ алдымен топтан шығып алу қажет.

Жапония құрамасы

ФИФА рейтингіндегі орны: 18

Әлем чемпионаттарындағы үздік нәтижесі: 1/8 финал (2002, 2010, 2018, 2022)

Бас бапкері: Хадзимэ Мориясу

Қазір әлем чемпионатын Жапония құрамасынсыз елестету қиын. Олар қатарынан сегізінші мундиальға жолдама алды.

Алайда 1998 жылға дейін жапондар әлем чемпионатына бірде-бір рет қатыспаған еді. Франциядағы дебюттік турнирінде олар өте сәтсіз өнер көрсетіп, топтық кезеңдегі үш матчтың бәрінде жеңілді және 32 команданың ішінде 31-орын алды.

Төрт жылдан кейін Жапония турнирді ұйымдастырушылардың бірі болды. Сондықтан әлем чемпионатына автоматты түрде қатысты. Бірақ Оңтүстік Корея секілді аса жарқырай алмады. Дегенмен өз тарихында алғаш рет плей-оффқа шықты. Алайда алғашқы айналымда болашақ қола жүлдегер Түркияға есе жіберді.

Содан бері 1/8 финал Жапонияның әлем чемпионаттарындағы ең үздік көрсеткіші болып келеді. Олар бұл нәтижені тағы үш рет қайталады, бірақ бірде-бір рет одан аса алмады. Ширек финалға ең жақын болған сәті 2022 жылғы Катардағы мундиаль еді. Сол кезде жапондар Хорватияға пенальти сериясында жол берді.

Азия футболының көшбасшыларының бірі саналатын Жапониядан 2026 жылғы әлем чемпионатында не күтуге болады? Кез келген нәтиже. Бәлкім, олардың өзі де өз мүмкіндігінің шегін толық білмейтін шығар. Топтан шығуға жақсы мүмкіндігі бар екені анық. Бірақ дәл солай бұл топтағы барлық қарсыласы да ойлайды.

Жапонияда біркелкі әрі теңгерімді құрам бар. Көптеген ойыншысы әлемнің үздік лигаларында өнер көрсетеді. Бірақ нағыз айқын жұлдыздар көп емес. Еуропадағы футболшыларының басым бөлігі өз клубтарында қосалқы рөлде жүр. Мысалы, «Ливерпульдегі» Ватару Эндо немесе «Бавариядағы» Хироки Ито. Ал құраманың басты жұлдызы Такефуса Кубо Испанияның ортаңқол клубтарының бірі саналатын «Реал Сосьедадта» ойнайды.

Жоғарыда айтылғандай, F тобының командаларын плей-оффтың алғашқы кезеңінде өте қиын жол күтіп тұр. Егер Жапония тағы да 1/8 финалға шықса, бұл 2026 жылғы әлем чемпионатындағы үлкен жетістік саналады. Себебі қазіргі форматта 1/8 финал – плей-оффтың екінші кезеңі. Яғни бұл бұрынғы ең үздік нәтижені қайталау емес, оны жақсарту болмақ.

Тунис құрамасы

ФИФА рейтингіндегі орны: 44

Әлем чемпионаттарындағы үздік нәтижесі: топтық кезең (1978, 1998, 2002, 2006, 2018, 2022)

Бас бапкері: Сабри Лямуши (Франция)

Тунис құрамасы үшін алдағы мундиаль қатарынан үшінші, ал жалпы тарихындағы жетінші әлем чемпионаты болмақ. Бір қарағанда, бұл әлемдік форумдарға қатысу тұрғысынан жақсы көрсеткіш.

Алайда олар үшін сан сапаға айнала қойған жоқ. Солтүстік африкалықтарға ауыр тимесін, бірақ олар бұған дейінгі әлем чемпионаттарының бәрінде статист рөлінде болды. Тунис бірде-бір рет плей-оффқа шыға алған емес.

2026 жылғы әлем чемпионатында да тунистіктер үшін топтық кезеңнен өту өте қиын болады. Тіпті әр топта үшінші орын алған 12 команданың сегізі 1/16 финалға жолдама алатынын ескерсек те.

Қазіргі құрамда ерекше бөліп айтар ойыншы табу қиын. Бұл құраманың көптеген футболшысы Францияда туып-өскен, сол елдің жасөспірімдер және жастар құрамалары деңгейінде бақ сынап көрген. Бірақ ақырында тарихи отанының ұлттық құрамасына ғана қажет болды.

Тунистің ең жарық жұлдызы ретінде тағы бір французды – бас бапкер Сабри Лямушиді атауға болады. Оның да тунистік тамыры бар. Тіпті кезінде «Карфаген қырандары» сапында ойнауға шақырту алған. Бірақ ол Франция құрамасын таңдады. «Үш түстілер» сапында 12 матч өткізіп, бір гол соқты.

Бапкер ретінде Лямуши әзірге ерекше жетістікке жете қойған жоқ. Дегенмен Тунис құрамасымен биылғы жылдың басынан ғана жұмыс істеп келеді.

Сондықтан тунистіктерді F тобының аутсайдерлері қатарына қосуға болады. Олардың плей-оффқа шығуының өзі үлкен ерлік ретінде бағаланар еді.

Швеция құрамасы

ФИФА рейтингіндегі орны: 38

Әлем чемпионаттарындағы үздік нәтижесі: күміс жүлдегер (1958)

Бас бапкері: Грэм Поттер (Англия)

1958 жылға дейін Швеция құрамасы әлем чемпионаттарында үш рет жартылай финалға шығып үлгерген. Солардың екеуі медальмен аяқталды. 1950 жылы – қола, ал 1958 жылы өз жерінде өткен мундиальда күміс жүлдеге қол жеткізді.

Бірақ содан бері «көк-сарылар» тек бір рет қана тұғырға көтеріле алды. Қызығы, бұл да дәл қазіргі секілді Солтүстік Америкада өткен турнирде болды. 1994 жылғы АҚШ-тағы әлем чемпионатында Мартин Далин, Томас Бролин, Томас Равелли және Хенрик Ларссон секілді шеберлері жарқыраған Швеция үшінші орын алды.

Содан кейін Швеция құрамасында ұзақ тоқырау басталды. Бұл кезең барлық уақыттағы ең үздік скандинав футболшысы саналатын Златан Ибрагимович дәуіріне тұспа-тұс келсе де, ұлттық команда үлкен жетістікке жете алмады. Ибрагимовичтің өзі екі ғана әлем чемпионатына қатысты – 2002 және 2006 жылдары. Екі жағдайда да командасымен бірге 1/8 финалда тоқтады.

Соңғы төрт әлем чемпионатының үшеуін шведтер өткізіп алды. Шын мәнінде, олар 2026 жылғы мундиальға да бармауы керек еді. Өйткені іріктеу кезеңін толықтай сәтсіз өткізді. «Көк-сарылар» Швейцария, Косово және Словениямен бір топта небәрі екі ұпай жинап, соңғы орын алды.

Алайда мундиальға есіктен кіре алмаған шведтер «терезе» арқылы жол тапты. Олар Ұлттар лигасындағы өз дивизионының жеңімпазы ретінде құрлықтық плей-оффқа қатысу мүмкіндігін алды. Ал өтпелі ойындарда алдымен Украинаға, кейін Польшаға мүмкіндік қалдырмады.

Швецияның 2026 жылғы әлем чемпионатына жету жолы Данияның Еуро-1992 алдындағы оқиғасын еске салады. Ол кезде даниялықтар бастапқыда турнир қатысушылары қатарында болмаған. Бірақ соңғы сәтте Югославияның орнына шақырылып, кейін Еуропа чемпионы атанды. «Көк-сарылар» скандинавиялық көршілерінің сол ғажайып жетістігін қайталай ала ма?

Әрине, мұны жүзеге асыру өте қиын. Бірақ ағылшын маманы Грэм Поттер баптайтын команданың кем дегенде 1/16 финалға шығуға толық мүмкіндігі бар. Швеция сапында өте жоғары деңгейдегі ойыншылар жиналған. Әсіресе шабуыл шебі мықты. «Арсенал» шабуылшысы Виктор Дьёкереш пен «Ливерпуль» форварды Александер Исак кез келген қорғанысқа қауіп төндіре алады. Ал Жапония мен Тунистің қорғанысын аса мықты деу қиын.

Дегенмен шведтерде үлкен мақсаттарды орындауға қажет адам ресурсы жеткіліксіз. Әсіресе қорғаныс пен қақпашы шебінде мәселе бар. Сондықтан «көк-сарылардың» минимум және максимум міндеттері бір-бірінен аса алыс емес: 1/16 финал немесе 1/8 финал шамасы.

Нидерланд – Жапония15 маусым, 01:00

Швеция – Тунис1 5 маусым, 07:00

Нидерланд – Швеция 20 маусым, 22:00

Тунис – Жапония 21 маусым, 09:00

Жапония – Швеция 26 маусым, 04:00

Тунис – Нидерланд 26 маусым, 04:00

*Қазақстан уақытымен