Ольга Рыпакованың Азия ойындарындағы «алтыны» және Шумахердің Формула-1-дегі алғашқы жеңісі: спорт тарихындағы бұл күн

Қазақстан

Қазақстандықтардың 2018 жылғы Азия ойындарындағы сәтті өнері

2018 жыл — осы күні қазақстандық спортшылар Джакартада өткен Азия ойындарында бірнеше медаль жеңіп алды:

Алтын медальді байдаркадан төрттікте өнер көрсеткен Илья Голендов, Алексей Дергунов, Сергей Токарницкий және Евгений Алексеев, дзюдошы Дидар Хамза және жеңіл атлетикадан үш қарғып секіру сайысында Ольга Рыпакова иеленді.

Күміс медальді байдаркадан жұптық жарыста Сергей және Тимофей Емельяновтар, Илья Голендов пен Андрей Ергучев жеңіп алды.

Қола медаль батутшы Пирмаммад Алиевке, қазақ күресінен Ерсұлтан Мұзаппаровқа, велотректен Артем Захаровқа және 4×100 метрлік эстафетадағы әйелдер құрамасына — Виктория Зябкина, Светлана Голендова, Элина Михина және Ольга Сафроноваға бұйырды.

Әлем

«Андерлехттің» жарқын жеңісі

1976 жыл — осы күні УЕФА Суперкубогының қарымта матчында «Андерлехт» «Баварияны» 4:1 есебімен ойсырата жеңіп, беделді трофейді иеленді.

Голдарды Роб Ренсенбринк (20, 82-минуттар), Франсуа Ван дер Элст (25), Ари Хан (59) және Герд Мюллер (63) соқты. «Бавария» қатарынан үшінші маусым УЕФА Суперкубогын жеңіп ала алмады.

Шумахердің Формула-1-дегі алғашқы жеңісі

1992 жыл — осы күні аты аңызға айналған неміс автокөлік жарысының шебері Михаэль Шумахер (Benetton-Ford) Бельгия Гран-приінде жеңіске жетті.

Екінші болып Williams-Renault командасының британдық пилоты Найджел Мэнселл мәреге жетсе, үздік үштікті оның командаласы, италиялық Риккардо Патрезе түйіндеді.

Шумахер үшін бұл Формула-1 Гран-приіндегі алғашқы жеңіс болды. Кейін ол жеті дүркін әлем чемпионы атанып, автоспорт тарихындағы ең үздік жарысушылардың біріне айналды.

«Реал Мадрид» УЕФА Суперкубогын жеңіп алды

2002 жыл — осы күні Мадридтің «Реалы» «Фейеноордты» 3:1 есебімен жеңіп, УЕФА Суперкубогының иегері атанды.

Висенте дель Боске шәкірттері 1998 жылдан бері УЕФА Суперкубогын жеңіп алған алғашқы Чемпиондар лигасының жеңімпазы болды. Сонымен қатар, «Реал» клуб тарихындағы коллекцияда жетіспей тұрған жалғыз трофейді де иеленді.

Бұл күні дүниеге келгендер

1921 жыл — Анджело Данди, атақты америкалық бокс жаттықтырушысы. Оның шәкірттері арасында Мұхаммед Али, Шугар Рэй Леонард, Джордж Форман, Пинклон Томас, Кармен Базилио және Вильфредо Гомес бар. 2012 жылдың ақпанында қайтыс болды.

1943 жыл — Жан-Клод Килли, француз тау шаңғышысы, үш дүркін Олимпиада чемпионы (Гренобль-1968).

1972 жыл — Павел Недвед, чехиялық футболшы, 2003 жылғы «Алтын доп» иегері.

1982 жыл — Энди Роддик, америкалық теннисші, жекелей сында әлемнің бұрынғы бірінші ракеткасы. 2003 жылғы US Open чемпионы.