Қазақстан құрамасы Junior Davis Cup турнирінің плей-офф кезеңіне бірінші орынмен шықты
Фото: ҚТФ
16 жасқа дейінгі Қазақстан теннис құрамасы Шымкентте өтіп жатқан Junior Davis Cup турнирінің Азия/Мұхит аймағы топтық іріктеу кезеңінде бірінші орын алды.
Шешуші матчта қазақстандық теннисшілер Оңтүстік Корея құрамасынан басым түсті.
Ахмади Маханов - Ким Дон Чжэні 6:2, 3:6, 7:6 (7:3) есебімен жеңіп, командаға алғашқы ұпайды әкелді. Екінші кездесуде Аңсар Ниетқалиев - Чан Чжун Соға 5:7, 2:6 есебімен жол берді.
Матч тағдыры жұптық сында шешілді. Маханов пен Ниеткалиев Чан Чжун Со/Шин Чжун Со жұбын 6:2, 6:2 есебімен қапы қалдырды.
Қазақстан құрамасы топтық кезеңді үш матчта да үш жеңіспен аяқтады. Бұған дейін қазақстандықтар Түрікменстан мен Пәкістан құрамаларын 3:0 есебімен ойсырата ұтты.
Ширек финалда Қазақстан теннисшілері Гонконг құрамасына қарсы ойнайды. Турнирдің үздік төрт құрамасы Түркияда өтетін Junior Davis Cup финалдық кезеңіне жолдама алады.