Қазақстан құрамасының капитаны соққан гол Ресей чемпионатындағы үздік деп танылды
«Динамо» ФК
Мәскеулік «Динамо» клубының қорғаушысы әрі Қазақстан әйелдер құрамасының капитаны Юлия Мясникованың голы Ресей Суперлигасының 16-турындағы үздік гол деп танылды.
Қазақстандық футболшы «Ростовқа» қарсы өз алаңындағы матчта гол соқты. Кездесу «Динамоның» 5:0 есебімен жеңісімен аяқталды. 58-минутта Анастасия Шлапакованың пасынан кейін Мясникова баспен соққы жасап, командасының төртінші голын енгізді. Бұған дейін Мясникова Ресей чемпионатының 16-турындағы символикалық құрамаға да енген.
Мясникова қазіргі маусым алдында мәскеулік ЦСКА сапынан «Динамоға» ауысты. Армия клубы құрамында қазақстандық футболшы Ресей чемпионы атанды. Ал Ресейге көшкенге дейін Шымкенттің «БИИК-Қазығұрт» командасында ойнап, Қазақстан чемпионатында алты рет жеңіске жетті.