Қазақстан волейболшылары Азия ойындарының плей-офф кезеңінде камбэк жасады
Фото: Нургали Жумагазы
Қазақстан ерлер құрамасы Айти мен Нагояда өтіп жатқан 2026 жылғы Азия ойындарында 9-16 орындар үшін плей-оффтың алғашқы матчында камбэк жасап, жеңіске жетті.
Қазақстандық волейболшылар алғашқы екі партияда Гонконг құрамасына жол бергенімен, кейін таразы басын өз пайдасына аударып, тай-брейкте жеңіске жетті. Кездесу 3:2 (22:25, 24:26, 25:20, 26:24, 15:11) есебімен аяқталды.
Топтық кезеңде Сергей Трикоз жаттықтыратын команда А тобында өнер көрсетті. Қазақстан Пәкістаннан (1:3) және Жапониядан (0:3) жеңіліп, кейін Өзбекстанды (3:1) ұтқан.
Қазақстан құрамасы келесі матчта Қырғызстан – Қытай Тайбэйі жұбының жеңімпазымен кездеседі.
Айта кетейік, 2026 жылғы Азия ойындары Жапонияның Айти префектурасы мен оның астанасы Нагояда өтіп жатыр. Жарыс 19 қыркүйекте басталып, 4 қазанға дейін жалғасады.