Қазақстандық файтер Ресейдегі турнирде жеңіске жетті
Фото: RCC Hard
Қазақстандық файтер Михаил Коханчик Ресейдің Нижний Новгород қаласында өткен Prime Fighting League турнирінде сәтті өнер көрсетті.
Кештің ко мэйн-ивент жекпе-жегінде Коханчик - «Палач» лақап атымен танымал ресейлік Иса Бегаевпен жұдырықтасты. 77 келіге дейінгі жартылай орта салмақта өткен айқас төрешілердің екіұдайы шешімі арқылы қазақстандық спортшының жеңісімен аяқталды.
Бұл жеңіс Коханчикке жұдырықтасу жекпе-жектеріндегі екі жеңілістен тұратын сериясын тоқтатуға мүмкіндік берді. Жұдырықтасу форматындағы айқастардан бөлек, қазақстандық спортшы кәсіпқой және әуесқой бокстағы мансабымен де танымал.
Коханчик кәсіби шаршы алаңдағы соңғы жекпе-жегін 2023 жылы өткізген. Кәсіпқой бокстағы оның рекордында алты жеңіс және бір жеңіліс бар.