2026-ӘЧ: Бразилияның алтыншы титул туралы арманы тағы да кейінге қалды

1/8 финал

Бразилия – Норвегия – 1:2 (0:0)

Голдар: Холанд, 79 (0:1); Холанд, 90 (0:2); Неймар, 90+10 (пенальтиден – 1:2)

Өткізілмеген пенальти: Гимарайнш, 14 (Бразилия)

Бас төреші: Эльфат (АҚШ)

Бразилия мен Норвегия құрамаларын атақ-дәрежесі жағынан да, футболға деген қызығушылық тұрғысынан да, бұл ойынның халыққа әсері жағынан да салыстыру мүмкін емес.

Әлемнің бес дүркін чемпионы, барлық әлем чемпионаттарына қатысқан командаға қарсы – бұған дейін плей-оффтың алғашқы кезеңінен аса алмаған әрі соңғы алты әлем біріншілігіне де қатыса алмаған ұжым. Қағаз жүзінде күштер арақатынасы анық еді.

Алайда қазіргі «викингтердің» құрамында өз тарихындағы ең үздік буын жиналған. Олар «доп сиқыршыларынан» қорқуды мүлде ойламайды. Оның үстіне Эрлинг Холанд секілді ойыншы қазіргі Бразилияда жоқ. Дәл осы шабуылшы матчтың басты кейіпкеріне айналды. Сонымен қатар қақпашы Эрьян Нюланд пен қанаттағы ойыншы Андреас Шельдеруптың да тамаша ойынын атап өткен жөн.

Командалар матчты бірден қарқынды бастады. Еуропалықтардың алғашқы шабуылы Патрик Бергтің голымен аяқталған еді, алайда офсайдқа байланысты есепке алынбады.

Көп ұзамай бразилиялықтар VAR көмегімен белгіленген пенальтиге ие болды. Бірақ Нюланд Бруно Гимарайнштың соққысын қайтарып, алғашқы ерлігін көрсетті.

Бірінші тайм тең деңгейде өтті. Үзілістен кейін алаңға шыққан Эндрик есеп ашуға жақсы мүмкіндік алды, бірақ Нюланд тағы да шеберлік танытты.

Осы сәт шешуші болды деуге болады. Кейін ойынның тағдырын норвегиялықтардың ауыстыруы өзгертті. Андреас Шельдеруп оң қапталда Данило Луисты бірнеше рет қапы қалдырып, 79-минутта Холандқа нәтижелі пас берді – 0:1!

Бразилия бірден есепті теңестіруге ұмтылды, бірақ нақты жоспар болмады. Тіпті қарсыластың қателігі арқылы гол соғуға мүмкіндік туған сәтте де Нюланд допты керемет түрде қайтарып қалды.

Көп ұзамай Шельдеруп тағы да Холандқа пас беріп, ол айып алаңы сыртынан дәл соққы жасап, есепті 0:2-ге жеткізді.

Соңғы минуттарда Неймар пенальтиден бір гол соқты. Бірақ бұл нәтиже ойын тағдырын өзгерткен жоқ – Карло Анчелоттидің командасы турнирден шығып қалды, ал Норвегия алғаш рет ширек финалға жолдама алды.

Айта кетерлігі, Бразилия Норвегияны әлі бірде-бір рет жеңген емес және әлем чемпионаттарында екі кездесудің екеуінде де жеңілген.

Мексика – Англия – 2:3 (1:2)

Голдар: Беллингем, 36 (0:1); Беллингем, 38 (0:2); Киньонес, 42 (1:2); Кейн, 60 (пенальтиден – 1:3); Р. Хименес, 69 (пенальтиден – 2:3)

Бас төреші: Фагани (Австралия)

Қызыл қағаз: Куанса, 54 (Англия)

Мексика құрамасы бұған дейінгі төрт матчта бірде-бір гол жібермеген еді. Бірақ Англия қақпаны үш рет дәл көздеп, оның екеуін үзіліске дейін соқты – Джуд Беллингем екі минут ішінде дубль жасады.

Матчтың басы ағылшындар үшін қиын өтті. Бірінші минутта-ақ Деклан Райс сары қағаз алды. Мексикалықтар белсендірек ойнап, бір сәтте Джордан Пикфорд командасын құтқарып қалды.

Алайда су ішуге берілген үзілістен кейін ойын өзгеріп кетті. Беллингем екі минут ішінде екі гол соғып, есепті 0:2-ге жеткізді.

Мексика берілмей, көп ұзамай бір гол қайтарды. Тіпті үзіліске дейін есепті теңестіруге мүмкіндігі болды, бірақ Пикфорд тағы да сенімді ойнады.

Екінші таймның басында Англия жағдайын қиындатып алды – Джаррелл Куанса алаңнан қуылды.

Соған қарамастан, ағылшындар он ойыншымен де гол соқты – Харри Кейн пенальтиді дәл орындады. Бірақ көп ұзамай өзі қарсыласқа пенальти әперіп, есеп 2:3 болды.

Соңғы жарты сағатта мексикалықтар толассыз шабуыл жасады. Ал Англия тек қорғануға көшіп, есепті сақтап қалуға тырысты. Томас Тухельдің командасы бұл міндетті орындады.

Осылайша, тартымды ойын көрсеткен Мексика турнирден шығып қалды. Ал Англияны ширек финалда Норвегия күтіп тұр.

Бүгін әлем чемпионатында 1/8 финалдың тағы екі ойыны өтеді:

Португалия – Испания. 7 шілде, 00:00

АҚШ – Бельгия. 7 шілде, 05:00

*Қазақстан уақыты бойынша.