Н-тобы: Испания, Кабо-Верде, Сауд Арабиясы, Уругвай

Испания құрамасы

ФИФА рейтингіндегі орны: 2

Әлем чемпионаттарындағы үздік нәтижесі: чемпион (2010)

Бас бапкері: Луис де ла Фуэнте

Н тобын қазіргі Еуропа чемпиондары бастап тұр. Испания құрамасы әлемдік рейтингте екінші орында орналасқан.

«Қызыл фурия» алдағы әлем чемпионатының басты фавориттерінің бірі саналады. Мұндай мәртебені ақтауға олардың толық мүмкіндігі бар.

Еуро-2024 турнирінде командасын чемпиондыққа жеткізген Луис де ла Фуэнте әлем чемпионатына арналған соңғы құрамды жасақтау кезінде біраз ойланғаны анық.

Мысалы, мадридтік «Атлетиконың» қорғаушысы Робен Ле Норман мен «Реал» футболшылары Дани Карвахаль және Дин Хёйсен соңғы тізімге енбей қалды. Тіпті мадридтік «Реалдың» бірде-бір ойыншысы Испания құрамасының сапында Солтүстік Америкадағы мундиальға қатыспайды.

Алайда бұдан испандардың қорғанысы әлсіреп кетті деу қиын. Қазір бұл шепте «Барселонаның» жас жұлдызы Пау Кубарси мен Марк Пубиль негізгі рөл атқарып жүр. Соңғысы Ле Норманды ұлттық құрамада да, клубтық деңгейде де негізгі құрамнан ығыстырып шығарды.

Жалпы қазіргі Испания құрамасы тәжірибе мен жастық жігердің тамаша үйлесімінен құралған. Тәжірибелі ойыншылар қатарында Маркос Льоренте, Эмерик Ляпорт, Фабиан Руис және Родри бар. Ал жас буынды Гави, Педри, Виктор Муньос, Нико Уильямс, Ламин Ямаль, Пау Кубарси мен Марк Пубиль бастап тұр.

Испанияның плей-оффқа шығатыны туралы мәселе талқыланбайды деуге болады. Бірақ бұл олардың тобы өте жеңіл деген сөз емес. Әсіресе Уругвай құрамасы испандарға айтарлықтай қарсылық көрсете алады.

Сондықтан «қызыл фурия» алғашқы матчтан бастап толық күшпен ойнауға мәжбүр болады. Өйткені 2014 жылғы әлем чемпионатындағы сәтсіз тәжірибені қайталау ешкімнің жоспарына кірмейді. Сол кезде Испания турнирге әлем чемпионы ретінде келіп, топтан да шыға алмаған еді. Ал кейінгі екі мундиальда да алғашқы плей-офф кезеңінен аса алмады.

Испания үшін ең маңызды міндеттердің бірі – 1/16 финалда Аргентинамен жолықпау. Сондықтан топта бірінші орын алу олардың басты мақсатының бірі болмақ.

Кабо-Верде құрамасы

ФИФА рейтингіндегі орны: 68

Әлем чемпионаттарындағы дебютант

Бас бапкері: Педру Лейтан Бриту

Кабо-Верде құрамасы әлем чемпионатында алғаш рет өнер көрсеткелі отыр. Алғашқы мундиалінде-ақ олар Испания және Уругвай секілді әлем чемпиондарын қамтыған өте қиын топқа түсті.

«Көк акулалар» бұған дейін Африка ұлттары кубогында да айтарлықтай жетістікке жеткен жоқ. Команданың ең үздік нәтижесі – ширек финал. Сондықтан олардың алғашқы әлем чемпионатында жарқын нәтиже көрсетуі қиын көрінеді.

Құрамдағы футболшылар әртүрлі елдерде дүниеге келген. Олардың арасында АҚШ, Ирландия, Франция, Нидерланд және Португалияда туған ойыншылар бар. Бірақ бәрі Кабо-Вердемен туыстық байланысын дәлелдеп, ұлттық құрама сапында ойнау мүмкіндігіне ие болды.

Ал бас бапкер Педру Лейтан Бриту – нағыз жергілікті маман. Футбол әлемінде Бубишта деген лақап атпен танымал жаттықтырушы Кабо-Вердеде туған, сол жерде футбол ойнап, кейін бапкерлік қызметін де бастаған.

Ол ұлттық құраманы алтыншы жыл қатарынан жаттықтырып келеді. Оның жетекшілігіндегі ең үлкен жетістік 2023 жылғы Африка ұлттары кубогының ширек финалы. Бірақ команда 2025 жылғы құрлық біріншілігіне жолдама ала алмады.

Кабо-Верде Н тобының басты аутсайдері саналады. Африкалықтардың өз мүмкіндігін көрсетуге ең жақсы мүмкіндігі Сауд Арабиясына қарсы матчта болуы мүмкін. Бірақ ол ойында да жеңіске жету оңай болмайды.

Сауд Арабиясы құрамасы

ФИФА рейтингіндегі орны: 61

Әлем чемпионаттарындағы үздік нәтижесі: 1/8 финал (1994)

Бас бапкері: Йоргос Донис (Грекия)

Сауд Арабиясы қатарынан үшінші рет, ал жалпы тарихында жетінші мәрте әлем чемпионатына қатысады. Бір қызығы, саудиялықтар әлем чемпионатындағы алғашқы ойынын дәл Солтүстік Америкада өткізген болатын. Бұл 1994 жылғы АҚШ-та өткен мундиаль еді.

Сол турнир бүгінге дейін Сауд Арабиясының әлем чемпионаттарындағы ең үздік нәтижесі болып саналады. Олар топтық кезеңде Марокконы 2:1, Бельгияны 1:0 есебімен жеңіп, плей-оффқа шыққан. Бірақ кейін қола жүлдегер атанған Швецияға жол берді. Содан бері «жасылдар» тағы бес рет әлем чемпионатына қатысты. Бірақ бірде-бір рет плей-оффқа шыға алмады.

Соған қарамастан, 2022 жылғы әлем чемпионатында олар болашақ чемпион Аргентинаны 2:1 есебімен жеңіп, бүкіл әлемді таңғалдырған еді. Бірақ кейін Польша мен Мексикаға есе жіберіп, жарыстан шығып қалды.

Қазіргі Сауд Арабиясы құрамасы түгелге жуық жергілікті чемпионат ойыншыларынан құралған. Жалғыз ерекшелік – Францияның «Ланс» клубында ойнайтын Сауд Абдулхамид.

Алайда мұны әлсіздік белгісі ретінде қабылдауға болмайды. Керісінше, Сауд Арабиясының ішкі чемпионаты соңғы жылдары айтарлықтай күшейді. Онда Криштиану Роналду, Карим Бензема, Малком, Рубен Невеш, Калиду Кулибали және Садио Мане секілді әлемдік жұлдыздар өнер көрсетеді.

Осындай деңгейдегі футболшылармен бірге ойнау жергілікті ойыншылардың да деңгейін көтерді. Сондықтан саудиялықтар әлем чемпионатында өз мүмкіндіктерін көрсетуге дайын.

Испания мен Уругвайға қарсыласу қиын болатыны анық. Бірақ Кабо-Вердеге қарсы кездесуде олар өз әлеуетін көрсетуге толық қауқарлы.

Уругвай құрамасы

ФИФА рейтингіндегі орны: 17

Әлем чемпионаттарындағы үздік нәтижесі: чемпион (1930, 1950)

Бас бапкері: Марсело Бьелса (Аргентина)

Уругвай – әлем чемпионаты тарихындағы алғашқы чемпион. 1930 жылы өз жерінде өткен алғашқы мундиальда олар бар болғаны төрт матчта жеңіске жетіп, әлем чемпионы атанды.

1950 жылы уругвайлықтар екінші рет әлемнің үздік құрамасы атанды. Бірақ содан бері әлем чемпионаттарында жүлдеге іліге алған жоқ.

Дегенмен олар тағы үш рет жартылай финалға дейін жетті. Бұл 1954, 1970 және 2010 жылдары болды. Бірақ үш жағдайда да медальсыз қалды.

Ал 2022 жылғы әлем чемпионатында «селесте» тіпті топтық кезеңнен өте алмады. Олар Португалия, Оңтүстік Корея және Ганамен бір топта ойнап, тек африкалық құрамадан ғана жоғары орын алды.

Уругвай құрамасы әрқашан жұлдыздарға бай болған. Қазіргі буын да сол дәстүрді жалғастырып келеді. Хосе Мария Хименес, Родриго Бентанкур, Рональд Араухо және Мануэль Угарте – әлем футболына жақсы таныс есімдер. Ал олардың ішіндегі ең жарқын тұлға – мадридтік «Реалдың» капитаны Федерико Вальверде.

Көпшіліктің пікірінше, Н тобында бірінші орын үшін негізгі күрес Испания мен Уругвай арасында өтеді. Оның үстіне екі команда топтық кезеңнің соңғы турында кездеседі.

Бұл матчтың маңызы өте жоғары болуы мүмкін. Өйткені екінші орын алған команда плей-оффтың алғашқы кезеңінде Аргентинамен жолығуы ықтимал. Ал мұндай сценарийді Испания да, Уругвай да қаламайды.

Испания – Кабо-Верде 15 маусым, 21:00

Сауд Арабиясы – Уругвай 16 маусым, 03:00

Испания – Сауд Арабиясы 21 маусым, 21:00

Уругвай – Кабо-Верде 22 маусым, 03:00

Кабо-Верде – Сауд Арабиясы 27 маусым, 05:00

Уругвай – Испания 27 маусым, 05:00

*Қазақстан уақытымен