I-тобы: Франция, Сенегал, Норвегия, Ирак

Франция құрамасы

ФИФА рейтингіндегі орны: 3

Әлем чемпионаттарындағы үздік нәтижесі: чемпион (1998, 2018)

Бас бапкері: Дидье Дешам

Франция қатысатын кез келген ірі турнирде олар басты фавориттердің бірі саналады. Мейлі ол Еуропа чемпионаты болсын, мейлі әлем чемпионаты болсын, Франция әрдайым жеңіс үшін күресетін командалардың қатарында.

Соңғы бес ірі турнирдің төртеуінде француздар өз мәртебесін ақтап, жүлделі орындарға ие болды. 2016 жылғы өз алаңындағы Еуропа чемпионатынан бері олар тек бір рет қана медальдан тыс қалды. Ол – Еуро-2020, онда Франция 1/8 финалда жарыс жолынан шығып қалған еді.

Соңғы он жылда Франция құрамасының қоржынында айтарлықтай жетістіктер жиналды: Еуропа чемпионаттарындағы күміс пен қола медаль, сондай-ақ қатарынан екі әлем чемпионатының финалы. 2018 жылы әлем чемпионы атанса, 2022 жылы күміс жүлдеге қол жеткізді.

Француздар алғаш рет 1998 жылы өз жерінде өткен әлем чемпионатында чемпион атанған болатын. Қызығы, Францияның екі чемпиондығы да бір адамның есімімен тығыз байланысты. Ол – Дидье Дешам. 1998 жылы ол құраманың капитаны болса, 2018 жылы бас бапкер ретінде команданы әлем чемпионы атандырды.

Төрт жылдан кейін Франция чемпиондық атағын қорғауға өте жақын келді. Алайда финалда Аргентинаға жол берді. Дегенмен француздар үшін әлем чемпионаттарында сәтсіз кезеңдер де болған. 2002 және 2010 жылдары олар тіпті топтық кезеңнен өте алмады.

Солтүстік Америкадағы мундиальға Франция қатарынан екі әлем чемпионатында жүлде алған команда ретінде келеді. Қазіргі құрамға қарасақ, олардың ерте сүрінуіне сену қиын. Килиан Мбаппе, Дезире Дуэ, Усман Дембеле, Эрнандес ағайындылары секілді жұлдыздардан құралған ұжымның әлеуеті өте жоғары.

Құрамда 1998 жылғы чемпион командамен тағы бір байланыстыратын тұлға бар. Ол – Маркюс Тюрам. Оның әкесі Лилиан Тюрам 1998 жылғы әлем чемпионатында Франция сапында алтын медаль жеңіп алған еді.

Францияның топтан шықпауы ғана емес, бірінші орын алмауының өзі үлкен сенсация болар еді. Оның үстіне I тобының жеңімпазы 1/16 финалда өз тобында үшінші орын алған құрамалардың бірімен кездеседі.

Сондықтан соңғы екі әлем чемпионатының финалисі бұл турнирде де ұзаққа баруға толық қауқарлы.

Сенегал құрамасы

ФИФА рейтингіндегі орны: 15

Әлем чемпионаттарындағы үздік нәтижесі: ширек финал (2002)

Бас бапкері: Пап Тиав

Сенегал өз тарихындағы төртінші әлем чемпионатына қатысады. Бірақ бұл қатарынан үшінші мундиаль болмақ. 2018 жылы африкалықтар топтық кезеңмен шектелсе, 2022 жылы плей-оффқа шықты. Алайда 1/8 финалда Англиядан 0:3 есебімен ойсырай жеңілді.

Сенегалдың әлем чемпионаттарындағы ең үлкен жетістігі 2002 жылы тіркелді. Өз тарихындағы алғашқы мундиальда «Теранга арыстандары» ширек финалға дейін жетіп, тек кейін қола жүлдегер атанған Түркияға жол берді.

Сол турнирде сенегалдықтар топта Уругвай мен Франциядан жоғары тұрды. Оның үстіне әлем чемпионы мәртебесіндегі Францияны ашылу матчында 1:0 есебімен жеңген болатын. Сол құрамда қазіргі бас бапкер Пап Тиав та өнер көрсеткен.

Биыл жеребе тағы да Сенегал мен Францияны бір топқа қосты. Оның үстіне олар алғашқы турда өзара кездеседі. Алайда бұл жолы 2002 жылғы сценарийдің қайталануы екіталай.

2026 жылғы әлем чемпионатына Сенегал Африканың ең мықты құрамаларының бірі ретінде келеді. Рас, олар Африка ұлттары кубогындағы чемпиондық атағынан кейін айырылып қалды. Финалда Марокконы пенальти сериясында жеңгенімен, кейін Африка футбол конфедерациясының апелляциялық комитеті техникалық жеңісті марокколықтарға берген болатын.

Сенегал сапында тәжірибелі ойыншылар жеткілікті. Бірақ олардың көбінің үздік кезеңі артта қалды. Садио Мане мен Эдуар Менди 34 жаста болса, Калиду Кулибали 35-те, Идрисса Гейе 36 жасқа келді.

Әрине, Николас Джексон, Исмаила Сарр және Пап Сарр секілді жас әрі талантты футболшылар бар. Бірақ жалпы алғанда құрамның жасы үлкендеу.

Сондықтан сенегалдықтарға Франция және Норвегиямен физикалық тұрғыдан бәсекелесу оңай болмайды.

Норвегия құрамасы

ФИФА рейтингіндегі орны: 31

Әлем чемпионаттарындағы үздік нәтижесі: 1/8 финал (1938, 1998)

Бас бапкері: Столе Сольбаккен

Сену қиын, бірақ Норвегия XXI ғасырда өткен бірде-бір әлем чемпионатына қатысқан жоқ.

Скандинавиялықтар соңғы рет 1998 жылы мундиальға жолдама алған болатын. Жалпы тарихында екі-ақ рет әлем чемпионатының финалдық кезеңінде ойнады. Екі жағдайда да 1/8 финалға дейін жеткен.

Қызығы, екі турнирде де олардың жолын Италия құрамасы кесті. Бірақ бұл жолы италиялықтар әлем чемпионатына қатыспайтындықтан, мұндай кездесу болмайды. Керісінше, норвегиялықтар іріктеу кезеңінде Италияны екі рет де ойсырата жеңді.

1998 жылғы құрамда Уле-Гуннар Сульшер, Хеннинг Берг және Флу ағайындылары жарқыраса, қазіргі буын одан да мықты көрінеді.

Александер Сёрлот, Оскар Бобб, Юлиан Рюэрсон, Мартин Эдегор және Эрлинг Холанд секілді ойыншылар әлемдік деңгейдегі жұлдыздар саналады. Сондықтан Норвегияны тек I тобының ғана емес, бүкіл турнирдің «қараңғы аты» деуге болады.

Францияны жеңу қиын болатыны анық. Бірақ «викингтер» олардан қорықпайды. Мұны Италияға қарсы матчтарда да көрсетті.

Столе Сольбаккен шәкірттерінің топтан шығу мүмкіндігі өте жоғары. Ең бастысы – қандай орынмен шығатыны. Егер норвегиялықтар алғашқы плей-офф кезеңінен өтсе, олардан жартылай финалға дейін жететін нәтиже күтуге болады.

Басты қауіп – эмоцияға беріліп кетпеу. Себебі қазіргі құрамдағы барлық футболшы үшін бұл алғашқы әлем чемпионаты болмақ.

Ирак құрамасы

ФИФА рейтингіндегі орны: 56

Әлем чемпионаттарындағы үздік нәтижесі: топтық кезең (1986)

Бас бапкері: Грэм Арнольд (Аустралия)

Франция, Норвегия және Сенегалмен бір топқа түскен Ирак құрамасы бастапқыда-ақ квартеттің басты аутсайдері саналады. Көпшілік олардың қарсыластарына ұпай сыйлайтын команда болатынын болжауда.

Азиялықтардың нақты мүмкіндік іздейтін жалғыз қарсыласы – Сенегал болуы мүмкін.

Ирак жақында Испаниямен жолдастық кездесуде 1:1 есебімен тең түсіп, көпшілікті таңғалдырды. Бірақ бұл нәтижеге тым үлкен мән беру қиын.

Қазіргі құрамның басым бөлігі жергілікті чемпионатта ойнайды. Дегенмен Кипр, Нидерланд, Польша, Өзбекстан және MLS лигаларында өнер көрсететін футболшылар да бар. Солардың бірі – жақында «Венецияны» Италия А сериясына шығаруға көмектескен шабуылшы Марко Фарджи. Қызығы, ол Норвегияда дүниеге келген және дәл сол құрамамен әлем чемпионатында кездесуі мүмкін.

Ирак тарихында тек бір рет қана әлем чемпионатына қатысқан. Бұл 1986 жылы Мексикада өткен турнир еді. Сол кезде олар үш матчтың бәрінде жеңіліп, топтан шыға алмады.

2026 жылғы әлем чемпионатында нәтижені жақсарту да өте қиын көрінеді.

Иракқа өте мықты қарсыластар түсті. Сондықтан олардың қол жеткізе алатын ең жоғарғы нәтижесі – топтағы үшінші орын болуы мүмкін. Бірақ оның өзі үлкен сенсация саналар еді.

Франция – Сенегал 17 маусым, 00:00

Ирак – Норвегия 17 маусым, 03:00

Франция – Ирак 23 маусым, 02:00

Норвегия – Сенегал 23 маусым, 05:00

Норвегия – Франция 27 маусым, 00:00

Сенегал – Ирак 27 маусым, 00:00

*Қазақстан уақытымен