L-тобы: Англия, Хорватия, Гана, Панама

Англия құрамасы

ФИФА рейтингіндегі орны: 4

Әлем чемпионаттарындағы ең үздік нәтижесі:1966 чемпионы

Бас бапкері: Томас Тухель (Германия)

Футбол отаны саналатын Англия ұлттық құрамасы тағы да «футболды үйге қайтару» мақсатымен додаға түседі. Бұл – ағылшын жанкүйерлерінің әйгілі ұраны, бірақ олар бұл армандарын әлем чемпионаттарында 60 жылдан бері жүзеге асыра алмай келеді.

Англия әлем чемпионы атағын тек бір рет – 1966 жылы, өз елінде өткен турнирде жеңіп алған. Содан бері ағылшындар ешқашан әлем біріншілігінде жүлдеге де іліне алған жоқ.

Ең жақын нәтижелері – 1990 және 2018 жылдар. Екеуінде де жартылай финалға дейін жетіп, кейін үшінші орын үшін матчтарда жеңіліп қалды. 2018 жылғы турнирде Англия Хорватиядан жеңілген еді, ал биыл дәл сол қарсыласпен тағы да топтық кезеңде жолығады.

Бас бапкер Томас Тухель алдын ала үлкен сынға ұшырады. Ол Фил Фоден, Коул Палмер және Трент Александр-Арнольд сияқты ойыншыларды құрамға қоспауымен таңғалдырды. Сонымен қатар «Ливерпульден» бірде-бір ойыншы шақырылмаған. Ал керісінше, Сауд Арабия чемпионатында ойнайтын 30 жастағы Айван Тоуни мен 35 жастағы Джордан Хендерсон құрамға енген.

Соған қарамастан, Англия құрамасында жоғары деңгейлі ойыншылар жеткілікті: Деклан Райс, Джуд Беллингем, Рис Джеймс, Морган Роджерс, Букайо Сака, Олли Уоткинс, Маркус Рэшфорд, Харри Кейн.

Команданың әлсіз тұсы – қақпашылар. Джордан Пикфорд пен Дин Хендерсон сенімді болғанымен, әлемдік деңгейдегі супержұлдыздар қатарына кірмейді.

Англия топтан шығуда қиындық көрмеуі тиіс. Плей-оффтың алғашқы кезеңінде де сәтті жолы болуы мүмкін. Бірақ басты мәселе ерте сенімділікке берілмей, турнирді жеңіл деп қабылдамау.

Хорватия құрамасы

ФИФА рейтингіндегі орны: 11

Әлем чемпионаттарындағы ең үздік нәтижесі: 2-орын (2018)

Бас бапкері: Златко Далич

Хорватия – жас мемлекет болғанына қарамастан, әлем футболында беделі жоғары команда. Олар үш рет жүлдеге ілінген. 1998 жылы дебюттік әлем чемпионатында қола жүлде, 2018 жылы Ресейде өткен турнирде күміс медаль иеленді. Ал 2022 жылы Катарда тағы да үшінші орын алды.

Модричтің жасы 41-ге жақындады және ол бұл турнирден кейін мансабын аяқтайтынын мәлімдеген.

Хорватия Англиядан әлсіздеу көрінгенімен, соңғы жылдары ағылшындарға жиі қиындық тудырып келеді. 2018 жылы олар Англияны финалға өткізбей қойған болатын.

Алайда жастың ұлғаюы және құрамдағы тәжірибелі ойыншылардың көптігі турнирде басты қиындық болуы мүмкін.

Гана құрамасы

ФИФА рейтингіндегі орны: 73

Әлем чемпионаттарындағы ең үздік нәтижесі: ширек финал (2010)

Бас бапкері: Карлуш Кейруш (Португалия)

Гана Африка футболының мықты өкілдерінің бірі саналады. Ең жарқын жетістігі – 2010 жылғы әлем чемпионатындағы ширек финал. Сол турнирде олар Уругвайға қарсы ойында пенальти сериясына дейін жетіп, жартылай финалға бір қадам қалғанда жеңіліп қалған еді.

Алайда кейінгі жылдары Гана құрамасының нәтижелері төмендеп кетті. Қазіргі ФИФА рейтингінде олар 73-орында.

Командада Антуан Семеньо, Иньяки Уильямс сияқты футболшылар Еуропаның мықты клубтарында ойнайды.

Бірақ басты мәселе – тұрақты команда жүйесінің жоқтығы. Тіпті тәжірибелі бапкер Карлуш Кейруш келгенімен, нәтижелер тұрақсыз.

Гана Англия мен Хорватияға қарсы күресуі қиын болады, бірақ үшінші орын үшін таласуға мүмкіндігі бар.

Панама құрамасы

ФИФА рейтингіндегі орны: 34

ӘЧ-тағы ең үздік нәтижесі: топтық кезең (2018)

Бас бапкері: Томас Кристиансен

Панама – әлем чемпионатына тек екінші рет қатысып отыр. Алғаш рет олар 2018 жылы Ресейде ойнаған. Сол турнирде Панама Англия, Бельгия және Туниске қарсы барлық матчта жеңіліп, жалпы есепте 2:11 нәтижесін тіркеген.

Команда құрамында Еуропаның топ клубтарында ойнайтын жұлдыздар жоқ. Бапкері – Томас Кристиансен, испан маманы.

Рейтингтегі 34-орынға қарамастан, Панаманың нақты деңгейі одан төмен деп бағаланады. Олар үшін негізгі мақсат – топтағы үшінші орынға таласу, ал плей-оффқа шығу үлкен сенсация болар еді.

L тобының матчтары

* Қазақстан уақыты бойынша